Europako abangoardiak

XX. mende hasieran, artistak estetika hutsetik haraindiko alderdiak jorratzen zituzten hainbat elkarte edo mugimenduren inguruan biltzen hasi ziren. Elkarte edo mugimendu hauei abangoardia historikoak izena eman zitzaien. Izan ere, hauek historikoki finkatutako gizartearen kontrako martxinada kritikoaren aitzindariak izan ziren, aldi berean, mendebaldeko artearen ondare figuratibo handia auzitan jarriz. Orduz geroztik, artearen iturria eta justifikazioa gogoaren esparruan lekutuko zen gehiago gertakarien alorrean baino.

Europan XX. mendearen lehen erdian sortutako mugimendu, estilo eta pertsonalitate artistikoak ondoko autoreen lanek ordezkatu zituzten erakusketan, bestak beste: Alexander Calder, Robert Delaunay, Lyonel Feininger, Albert Gleizes, Juan Gris, Vasily Kandinsky, Plaul Klee, Oskar Kokoschka, Franz Marc, Joan Miró, Amedeo Modigliani, László Moholy-Nagy, Piet Mondrian, Emil Nolde, Pablo Picasso eta Joaquin Torres-Garcia.