Arte Liluragarria

Itsasadarraren ondoko terraza

Ama Louise Bourgeoisen eskulturarik handinahienetakoa da, eta armiarmak inspirazio-iturri dituen sail baten parte da. Hain zuzen ere, artistak 1940ko hamarkadan egindako hainbat marrazkitan agertu zen lehen aldiz armiarmaren motibo hori, eta laurogeita hamarreko hamarkadan garrantzi handia izan zuen bere obran. Armiarmaren ikonografia oso presente dago artistaren ibilbidean, eta amari egindako omenaldi bat da, ama ehulea baitzuen.

Bourgeois diziplina anitzeko artista izan zen, baina eskultura izan zen haren adierazpide nagusia, artea espazioarekin lotzeko aukera ematen zion eta. Ama eskulturak ia 9 metroko garaiera du, eta badirudi mehatxari hurbiltzen zaigula, baina, era berean, erakargarri zaigu, eta bikaina eta babeslea ere izan daiteke. Zergatik ote?

304 aretoa, hirugarren solairua

El Anatsui bere metalezko eskultura berezi eta iradokitzaileengatik da ezaguna batik bat. Afrikako molde artistiko tradizionaletan sakonki errotutako obrak dira Anatsuirenak, eta artistak eskultura ulertzeko duen berezko ikuspuntua erakusten dute estetika garaikide globala erabiliz. Halaber, haren lanek hainbat irakurketa egiteko aukera eskaintzen dute Afrikaren historiaren eta kolonialismoaren inguruan.

Anatsuik darabilen prozesu teknikoa harrigarria da. Zure ustez, nola gauzatuko ote du?

Itsaso gorakorra lana ohartarazpen bat da, naturak eta zibilizazioek bat-bateko aldaketak izan ditzaketela dioen abisua. Haren eskala klima-aldaketaren izugarrikeriaren metafora da.

Nola sentiarazten zaitu zilar koloreko itsaso gorakor honek?

Jenny Holzerrek askotan lortu du bere proiektu artistikoak espazio publikoan txertatzea, eta hitza izaten da bere obrako adierazpide nagusietako bat.

Laurogeiko hamarkadaz geroztik, Holzerrek injustiziaren, zapalkuntzaren, botere-gehiegikeriaren eta abarren kontrako aforismoak eta salaketa-mezuak bota izan ditu mundura. Pantaila elektronikoak, eskala handiko proiekzioak edota alde batetik bestera dabiltzan kamioietan jarritako errotulu digitalak erabili izan ditu horretarako, baita oraintxe ikusten ari zaretena bezalako marmol hotzezko bankuak ere.

Hurbildu zaitez balkoiko barandara eta deskarga ezazu zure mugikorrean Like Beauty in Flames lan digital bereziaren aplikazioa. Artelan horretan, Holzerrek errealitate areagotua erabili du sorkuntzarako bide gisa, eta aplikazioak hiru esperientzia ezberdin eskaintzen ditu: toki jakin batean kokatuta Museoaren arkitekturarekin hartu-emanean dauden bi obra eta… munduko edozein lekutatik aktiba daitekeen hirugarren bat!

303 aretoa

Beti edozein filiazio artistikotik oso urrun egon bazen ere, Robert Rauschenberg Iparramerikako gerraosteko bilakaera artistikoaren zati handi baten aitzindaritzat jo izan da espresionismo abstraktuaren garaitik.

1962an, Andy Warholen estudiora egindako bisita baten ondoren, Rauschenbergek serigrafiak erabiltzeari ekin zion pinturetan irudi errealak sartzeko, hasi bere argazkietatik eta komunikabide ezagunetan aurkitutako beste batzuetara. Teknika berritzaile horri esker, irudiak eskala askoz ere handiagoan erreproduzitu eta beste testuinguru batzuetan berrerabil zitzakeen.

Gabarra, ia hamar metro zabaleko mihisea, Rauschenbergen pintura serigrafiatuetako handiena da. Obra zuri, beltz eta gris itzel horrek artistak bere pintura serigrafiatuetan behin eta berriz erabilitako gai eta irudi asko biltzen ditu.

Gai al zara horiek identifikatzeko?

303 aretoaren ondoko korridorea

Zer sentitzen duzu artelan bati begiratzean? Zure ustez, gainerakoek ere gauza bera sentituko al dute haren aurrean?

Ez galdu ARTETIK: From the Art esperientzia digitala!

Instalazio horrek Guggenheim Bilbao Museoaren Bilduma osatzen duten artelanek pizten dizkizuten emozioak arakatzeko aukera eskainiko dizu. Arian-arian osatuz doan esperientzia digitala da, eta emozioen grafiko kolektibo bat sortzen du bisitariek erabili ahala.

Senti ezazu artea Museoaren Bildumaren bidez eta parteka itzazu zure emozioak! Ikusleengan lilura pizten duten beste obra batzuk ere ezagutzeko aukera izango duzu.