Didaktika ekimenaren baitan, Museoak erakusketen osagarri diren hezkuntza-guneak, eduki digitalak eta jarduera bereziak diseinatzen ditu ikusgai dauden lanak hobeto ulertzen laguntzeko tresnak eta baliabideak eskaintzeko xedearekin. Atal honek Barbara Krugerren (New Jersey, 1945) lanaren dimentsio publikoa ezagutzera gonbidatzen gaitu: Krugerren artea museoetatik atera eta hiriko paisaiaren parte bihurtzen duen dimentsioa, alegia. Museoko 201 aretoan dagoen bitrinan, artistaren lana jendarteratzeko modu berriak ahalbidetu dituzten eguneroko objektuak daude ikusgai, artistak berak diseinatuak batzuk eta elkarlanean eginak besteak.