Une honetan ikusgai

Guggenheim Bilbao Museoaren Bildumako artelanak

2023.01.24 - 2025.12.31

Guggenheim Bilbao Museoaren Bildumaren erakusketa honek biltzen duen lan-sorta, Bigarren Mundu Gerraz geroztik artearen historian izandako une garrantzitsuenen erakusgarri da. Artearen eta arkitekturaren arteko lotura areagotzeko asmo handiko keinu batean, Bildumako piezarik adierazgarrienetako batzuk jasotzen dituen instalazio honek agerian jartzen du eraikinaren jatorrizko egitura, eta goratu egiten ditu Museoko hirugarren solairuko gune zabal eta argitsuak.

Erakusketa artista jakinen artelan berezietan nahiz Bilduman ondo ilustratuta dauden artearen historiako mugimenduetan oinarritzen da. Hala, beren garaiko abangoardian aritu ziren eta beren esparruan ekarpen benetan erabakigarriak egin zituzten sortzaileak aurkezten ditu. Areto bakoitzak artista bakar baten edo partekatutako kezkak ikuspegi desberdinetatik aztergai dituzten hainbat artistaren ekoizpena behatzeko aukera eskaintzen du.

Solairu honetako areto batzuetan, esperientzian oinarritutako kokapen zehatzeko instalazioak edo piezak daude erakusgai, esaterako Sol LeWitt eta El Anatsui artistei eskainitako guneetan. Azken horren obra, Itsaso gorakorra, artista afrikarraren ibilbidean berebiziko garrantzia izan duen eskultura garaikidea da, Bildumarako eskuratutako azkena izateaz gain. Beste areto batzuetan, Bigarren Mundu Gerraren ondoren sortutako arte abstraktuaren garapenari buruzko muntaiak daude ikusgai, gaika antolatuta, baita arte abstraktuaren eta espiritualaren arteko hurbilketak ere, zein 1960tik 1980ra bitartean garatutako arte-lengoaiak, hala nola Pop artea eta herrikoitasunak sorkuntza garaikidean duen presentzia. Gainera, korronte artistiko horiei eta haietan ekarpena egin zuten egileei buruzko dokumentazio historikoa ere badago erakusgai.

2025eko udazkenean, Rodenstock Bildumak epe luzerako maileguan utzitako hainbat lan jarriko dira ikusgai 305, 306 eta 307 aretoetan. Lucio Fontana, Yves Klein, Agnes Martin, Cy Twombly edo Jeff Koons bezalako artista ezagunen piezak izango dira, eta lehen aldia izango da lan horiek multzo gisa erakutsiko direna jendaurrean.

Aretoak: hirugarren solairua
Komisarioa: Lekha Hileman Waitoller, Marta Blàvia

Erakusketa

3. solairua

El Anatsui
Itsaso gorakorra (Rising Sea), 2019
Aluminioa eta kobrezko haria
800 x 1400 cm
Guggenheim Bilbao Museoa

Yayoi Kusama
Infinituaren isla-gela – Gizakientzako zorion-guraria, unibertsoaz harainditik igorria (Infinity Mirrored Room – A Wish for Human Happiness Calling from Beyond the Universe) , 2020
Beira ispiluduna, zura, LED argi-sistema, metala eta panel akrilikoa
293.7 × 417 × 417 cm
© YAYOI KUSAMA
Ota Fine Arts-en kortesia

Litekeena da bisitari-kopuruak edukiera mugatuko artelan honetara sartzeko itxaronaldiari eragitea

Ba al
zenekien...?

Hormek hitz egingo balute...

Didaktika proiektuaren barruan, Museoak hezkuntza-espazioak diseinatzeaz gain, erakusketak osatzen dituzten jarduerak antolatzen ditu, aretoetan nahiz online eran tresnak eta baliabideak eskainiz, erakusten diren obrak errazago hautemateko eta ulertzeko.

El Anatsui

El Anatsui (1944) Nigerian kokatutako artista ghanatarra da, eskultura garaikideko erreferenteetako bat, eta 1998an edari alkoholdunen aluminiozko tapoiak erabiltzen hasi zen bere obrak egiteko

Jenny Holzer

1997an, Museoak Jenny Holzer (1950) gonbidatu zuen berak hautatuko leku baterako obra bate egiteko; hain zuzen ere, 101 aretoa aukeratu zuen (Atariaren ondoan dagoena)