Jungwirthen Vienako estudioan
Jungwirthen Vienako estudioan

Didaktika guneko bitrinak Martha Jungwirthek lanerako erabiltzen dituen zenbait tresna eta material biltzen ditu: pintzelak, pintura-hodiak eta koloreak nahasteko ontziak, denak haren Vienako estudiotik ekarriak.

Artistak hainbat teknika erabili izan ditu bere ibilbidean zehar: koloretako arkatzak, grafitoa, pastela, ikatz-ziria, luma eta tinta, akuarela eta olio-pintura. Haren paleta ere aldatu egin da urteek aurrera egin ahala, eta bere obrarik berrienetan kolore-gama zabala ageri da: granateak, karminak, gorriminak, moreak, berdeak eta horiak. Koloreak adierazkortasuna transmititzeko eta espazio piktorikoa antolatzeko balio dio margolariari.

Jungwirthen ekoizpenean ez-ohiko euskarriak dira nagusi. Adibidez, gogoko du paper zaharrak, are zikinak, berezkoa duen patina. Marko zaharren atzealdetik ateratako kartoi gainean lan egin izan du, baita artisau-paper gainean ere, eta balantze- eta kontabilitate-liburuak erabili izan ditu artista-koaderno gisa.

Kronologia labur honek Jungwirthek bere ibilbidean zehar aztertu dituen teknikak biltzen ditu:

1956–1963. Jungwirthek Vienako Arte Aplikatuen Akademian ikasiko du. Naturala denaren marrazkian zentratuko da.

1967–1977. Marrazketa-eskolak emango ditu Vienako Arte Aplikatuen Akademian, eta ikasleei eguneroko objektuak irudikatzeko eskatuko die; esate baterako, idazmakina bat edo tipula bat, tintaz eta lumaz egindako marrazkia soilik erabilita.

1968. Wirklichkeiten (Errealitatea) Vienako artisten kolektiboko emakume bakarra izanik, koloretako arkatzekin eta akuarelekin obra figuratiboak sortuko ditu; hots, emakume biluziak, berrikuntza teknologikoak eta karreretako autoak.

1974. New Yorkera bidai bat egin ondoren, Jungwirthek akuarelak utzi eta lerroan kontzentratuko da. Horrela, arkatzak eta ikatz-ziriak erabiltzen hasiko da. Garbigailu bat eta hainbat etxetresna elektriko marraztuko ditu Indesit seriean, Italiako fabrikatzailearen izenetik hartuta.

1980. Formatu handiko akuarelak sortuko ditu, batzuetan papera hainbat norabidetan biratuta.

1986. Pinturetan trementinarekin diluitutako olioa erabiliko du, kartoi gainean geruza finak aplikatuz, akuarelen antzeko akabera lortu arte.

1995. Uda batean Greziako Naxos eta Paros uharteetan dagoela, karea aplikatuko du marrazkietan, eta akuarelaz paisaiak margotuko ditu kontu-liburuetan.

2004. Birmaniara eta Kanbodiara bisita bat egin ondoren, akuarela batzuk egingo ditu formatu bertikalean, eskuz egindako paper gainean.

2019. Jungwirthek Troyako zaldia egingo du, 16 m2-tik gorako olio-pintura monumentala, Vienako Estatuko Operaren oihalean aurkeztuko dena.