Azken aldia: eskultura piktorikoa
1954an, moztutako, tolestutako eta margotutako metalezko xaflekin moldatutako lehen obra multzoa hasi zuen Picassok Vallaurisen. Urte horretan bertan, lau eskultura sortu zituen Sylvette David modelo hartuta, eta modan jarri zuen mundu osoan haren orrazkera. Sylvette (1954) izeneko obran, Picassok mihise bat balitz bezala margotu zuen xafla tolestua, baina, pixkanaka, metala bera paper ebakia balitz bezala lantzen hasi zen, pinturaren beharrik gabe argi-itzalak sortzeko moduan tolestuta. Picassoren azken ekoizpenaren ibilbideak Emakume burua (1962) du azken mugarria: eskulturak Jacqueline Roque du irudigai, artistaren azken musa eta emaztea, begi nabarmen, sudur konkor eta adats iluneko emakumea. Berriki egindako ikerketen arabera, Picassok zilarra erabili zuen belarrien, begien, ilearen nahiz ahoaren xehetasunak egiteko, eta erliebe gehigarri bat erantsi zion hala metalari.