Marine Hugonnier: Landa-txostenak / Field Reports

Marine Hugonnier (Paris, 1969) Londresen bizi den artista eta zinemagile frantsesa da, eta haren obrak munduaren interpretazio-baliabideak aldatzea bilatzen du etengabe.

Horretarako, dokumental- eta fikzio-estrategiak erabiltzen ditu, erregistro bakoitzaren berezko anbioguotasunak aprobetxatuz. Azken hamarkadan egin dituen ekoizpenetan, esperimentu filmikoetan aurkitu izan du kontrapuntua prozesu sozialen zuzeneko behaketak; esperimentu horietan, irudiak hartzeko gailu tradizionala —pelikula, lentea eta kamera ezinbesteko elementutzat hartuta— fenomeno eta agente naturalen aurrez aurre jartzen da, eta irudikapenaren mugak bilatzen ditu. Meadow txostena (Meadow Report, 2021) izeneko obra berria egiteko, artista Givernyko lorategiko urmaelaren aurrean kokatu zen ilunabarrean; hau da, Claude Monetek sortutako landare exotikoen lorategi artifizialean —hantxe margotu zituen pintoreak bere nenufar ospetsuak bere bizitzako azken hamarkadetan, pixkanaka ikusmena galtzen zihoala—. Hugonnierrek funtsezko bi gai horiek jorratzen ditu paisaiaren erregistro kontenplatibo eta isilaren bidez: batetik, naturaren manipulazioa, eta, bestetik, hura behatzeko teknologiarekiko dugun mendekotasuna. Zuzeneko pertzepzioa bilatu nahian, pelikularen une jakin batean artistak lentea kameratik kentzen du, eta horrek xehetasun guztiak urdin kolore bizira itzaltzea eragiten du, kolapso kromatikoa. Piezaren izenburuak “meadow” (larrea) hitzaren esanahi literalarekin jolas egiten du, baita The Limits to Growth (1972) bezala ere ezagutzen den Meadows txostenaren erreferentziarekin ere, planetako baliabideen kontrolik gabeko erabilerak egungo klima-krisia eragingo zuela aurreikusi zuen lehen dokumentuetako bat, alegia. Hugonnierren pieza nagusi horrekin batera, beste film eta argazki batzuk ere egongo dira ikusgai. Guztiek ere agerian utziko dituzte, bai 103 aretoan bai Museoaren Entzungelako proiekzio-programan, artistaren azken aldiko praktika eta praxi filmikoaren inguruan duen ikuskera berezia.