Irudi digitaleko ikastaroa: Begiratzen ikasi

Ikastaro honetan, irudi digitalaren bidez istorioak kontatzen ikasiko dugu, eta argazkigintzaren erabilera irudimentsu eta aktiboa sustatuko dugu baita ere. Errealitatea hautemateko dauden ikuspegi desberdinen inguruan hausnartuz, inguruan barra-barra ditugun irudien aurrean begirada kritikoa garatzea da helburua.

Irudi finkoarekin hasiko gara eta, ondoren, mugimendudun irudia txertatuko dugu pixkanaka argazkigintzari buruzko kontzeptu errazak (konposizioa, enkoadratzea, argia, paisaia, herenen araua…) ikasten goazela.

Talde-lana bultzatuko dugu irudiak planifikatu eta asmatzeko orduan, sormena erabiliko dugu planteatutako gaiei irtenbidea emateko, eta jolasa, esperimentazioa eta irudimena baliatuko ditugu. Yoshitomo Nara, Anthony McCall eta Paul Pfeiffer artisten erakusketak bisitatuko ditugu inspirazio bila.

Posible da telefono mugikorra edo tableta ekartzea argazkiak egiteko, baina kamerak ere egongo dira horiek erabiltzea nahiago dutenentzat.

Jardueran izena emateko ezinbestekoa da saioetan zehar partaideen irudiak hartzeko baimena onartzea. Baimen hori tutoreei bidaliko diegu jarduera hasi aurretik sina dezaten.

Ikastaroa urritik maiatzera bitartekoa izango da, eta hurrenez hurreneko tailer gisa planteatuta dago.

Azaroak 3, igandea: Mundua zure eskuetan

Egia al da ikusten dugun guztia? Argazkiaren bidez, handia dena txiki egin dezakegu eta txikia dena handi.

Azaroak 10, igandea: Argazkiek istorioak kontatzen dituzte

Koloreak, formak, konposizioak eta argiak adierazi nahi duzun hori argazkian islatzen lagunduko dizute.

Azaroak 17, igandea: Mugimendua

Nola agertzen da mugimendua irudi finko batean? Argazkigintza mugimendua harrapatzeko tresna gisa erabiltzen ikasiko dugu.

Saioen gidariak: Aitziber Aguirre

Adina: 9–12 urte
Ordutegia: 10:15–11:45
Iraupena: 90 min
Hizkuntza: ele bitan (gaztelaniaz eta euskaraz)