Guggenheim Bilbao Museoak Getty erakundearen Arte eta Jasangarritasun beka lortu du

 

• The Getty Global Art and Sustainability Fellows bekaren bidez, datozen sei urteetan Museoak hiru profesional kualifikatu izango ditu erakundeak ingurumen-jasangarritasunaren arloan dituen ekimenetan laguntzeko eta haiek dinamizatzeko

Guggenheim Bilbao Museoak Los Angelesko Getty erakunde ospetsuak ematen duen Arte eta Jasangarritasun beka lortu du: klima-aldaketari eta ingurumenaren kudeaketari buruzko nazioarteko elkarrizketetan aitzindaritzan diren erakunde kultural eta zientifikoei laguntzeko helburua duen laguntza.

Beka horri esker, Museoak hiru profesional kualifikaturekin indartuko du bere taldea, eta, datozen sei urteetan, langile horiek Museoak ingurumen-kudeaketan dituen lehentasunak dinamizatuko dituzte. Era berean, Museoko esperientziari esker, langileek bere trebakuntza areagotzeko aukera izango dute kultur eta arte kudeaketaren arloan krisi klimatikoaren inguruko konponbide praktikoak bultzatuz.

Guggenheim Bilbao Museoaz gain, Gettyk sei kontinentetako beste hamalau erakunde aukeratu ditu, ingurumen-jasangarritasunean duten lidergo eta konpromisoagatik nabarmenduak denak ere: Academy of Athens (Grezia), Bibliothèque nationale (Frantzia), James Cook University (Australia), Museu Paraense Emílio Goeldi (Brasil), Rochester Institute of Technology (AEB), Singapore Art Museum with the National Gallery (Singapur), University College London's Institute for Sustainable Heritage (Erresuma Batua), eta Photosynthesis sareko artisten egonaldi-programa Denniston Hillen (AEB), LUMA Arlesen (Frantzia), Pivôn (Brasil), Srihatta-Samdani Art Centren(Bangladesh), Tate St Ivesen (Erresuma Batua) eta The Mothershipen (Maroko).

Ingurumen-jasangarritasunarekiko konpromisoa

Proiektu hau beste aurrerapauso bat da Guggenheim Bilbao Museoak jasangarritasunarekin hartua duen konpromisoan. Izan ere, erakundeak abian jarri berri ditu 2030erako neutraltasun klimatikoa lortzera bideratutako beste ekimen garrantzitsu batzuk.

Hala, ekainaz geroztik, Museoa Culture for the Planet aliantzako kide fundatzailea da; nazioarteko komunitate horrek artearen eta kulturaren sektorean jasangarritasunerako trantsizioa bizkortzea du helburu. Gainera, Museoak, aurten ere, Gallery Climate Coalition-GCCko kide aktibo izaten jarraituko du; 2025ean, bere jarduera osoaren karbono-aztarna neurtzeari ekin dio lehen aldiz; urteko azken hiruhilekoan, buru emango dio eraikinaren jatorrizko sabai-leihoetatik sartzen den argi naturalaren erabilera maximizatzeko aukera eskainiko duen argiztapen dinamikorako proiektu bati; eta urtearen amaieran Lurraren arteak inauguratuko du, ingurumenera bideratutako nazioarteko hausnarketa planteatzen duen erakusketa handia, Iberdrola etxeak babestua.