31 maiatza 2018
GUGGENHEIM BILBAO MUSEOAREN FUNDAZIOAREN PATRONATUKO BILERA
Guggenheim Bilbao Museoaren Fundazioaren Patronatua batzartu da gaur Iñigo Urkullu Lehendakari jauna buru zela, eta bileran honakoak izan dira: Unai Rementeria Maiz jauna, Bizkaiko Ahaldun Nagusia eta Fundazioaren Batzorde Betearazlearen Presidentea; Bingen Zupiria jauna, Eusko Jaurlaritzako Hizkuntza Politika eta Kultura Sailburua; Fundazioaren gobernu-organo gorenaren zati diren enpresen eta erakundeen ordezkariak; eta New Yorkeko eta Bilboko Guggenheim Museoen Zuzendariak, Richard Armstrong jauna eta Juan Ignacio Vidarte jauna.
Ohikoa denez, Museoaren urteko lehen bost hilabeteko jardunaren balantzea errepasatuz hasi da bilera; epealdi horretan, eta gaurko egunera arte, bisitarien kopurua 392.354 pertsonakoa izan da, 2017ko epealdi berean izandakoa baina %1 gehiago eta data honetarako aurreikusitakoa baina %19 gehiago. Halaber, Museoaren XX. Urteurrena zen horretan hedabideetan izandako eraginaren berri ere eman da. Erakundearen jarduerek hedabideetan izandako oihartzuna 18.718 albistekoa izan zen; hala, prentsan izandako agerpen-kopuruaren araberako rankingean, Museoa lehenengo postuan dago nazioarteko prentsari dagokion sailkapenean, eta bigarren postuan Estatu barruko prentsari dagokionez. Azkenik, saio honetan 2017ko ekitaldiari dagozkion Fundazioaren kontuak onartu dira.
Bileran zehar, Plan Estrategikoaren burutzapen-egoeraren berri eman da; horren baitan, besteak beste, gizarte erantzukizun korporatiboko gaietan Museoak gauzatzen dituen ekintzak jaso eta antolatzen dituen dokumentua idatzi da. Hilabete hauetan aurrera egin duten ekimenen artean, Sociedad Tenedorak artelanak eskuratzeko inbertsio-plana dago, zeina berriz ere martxan jarri baita, 998.878,62 euroko ekarpenarekin; Eusko Jaurlaritzaren eta Bizkaiko Foru Aldundiaren —bakoitzak %50— ekarpenarekin gauzatuko da hori, ekitaldi honetan. Era berean, Tenedorari dagokionez, jakinarazi da sozietate horren Kontseiluak, gaur bertan egin den bilera batean, bi artelanen dohaintza jaso duela Bildumarako: Munduko barreak, Esther Ferrerrena, eta Gogoeta-objektua, Alyson Shotz-ena; bi artelanak Museoan egon dira ikusgai, Esther Ferrer. Elkarri lotutako guneak eta Artea eta espazioa erakusketetan, hurrenez hurren.
Bukatzeko, saio honetan Patronatuari aurreratu zaizkio datozen urterako aurreikusita dauden erakusketetako batzuk: hala nola, Jenny Holzer eta Thomas Struth artistei eskainitako atzera begirakoak; Giorgio Morandiren lanaren eta maisu klasikoek harengan izandako eraginaren gaineko begirada berri bat; Kunsthalle Bremen-en funtseko maisulanen hautaketa bat; edo Jesús Soto venezuelarraren ibilbidearen berrikusketa bat; horrez gain, Film & Video aretorako bideo-instalazioak egongo dira: Isiltasun handia, Allora & Calzadilla-rena, edo Dar-dar, Jesse Jones-en eskutik.
Bidali mezu bat xehetasun guztiekin helbide honetara: media@guggenheim-bilbao.eus
Mezuan informazio hau jarriko da: grabazio-mota, eguna, ordua eta iraupena, zein den grabazioaren helburua (eraikina, erakusketak), elkarrizketa behar duen edo bestelako informazio interesgarria.
Behin eskaera onartuta, Museoak taldea osatzen duten kide guztiei buruzko datuak jasoko ditu, filmazioa egin aurretik.
Ikus-entzunezko produkzioetan Museoaren irudia erabiltzeak tarifa bat izan dezake. Eskaera bakoitza Irudi Batzordeak aztertuko du. Eskaera baten berrikuspena 3 egun baliodunetik 2 astera arte luza daiteke. Saioak aldez aurretik planifikatzea gomendatzen dugu.
Irudiak lortzeko, sar zaitez hemen eta deskargatu materiala. Premiazko eskaeretarako, posta elektronikoaren bidez edo telefonoz jar zaitezke harremanetan.
Irudiak beren egilearen izenarekin erreproduzitu behar dira, distortsionatu, mutilatu edo aldatu gabe. Irudi horiei beste erabileraren bat eman behar bazaie, Museoaren berariazko baimen idatzia beharko da.
Informazio guztia web orrialdeko Prentsa sailean eskura daiteke, erakusketen atalean.
Prentsa-txartela aurkeztu behar baduzu Museoko leihatiletan, sarrera doan eskuratuko duzu. Kontuan izan kazetariei Museoa doan bisitatzeko aukera ematen zaiela, museoaren jarduerei, ekitaldiei eta erakusketei publizitatea ematearen truke.
Bidali mezu bat hedabideari eta kazetariari buruzko informazio osoarekin media@guggenheim-bilbao.eus helbidera.