Ingurumen - jasangarritasuna

Iraunkortasuna Museoaren jardueraren zeharkako ardatza izango da 2023an; hori dela-eta, erakundeak asmo handiko Iraunkortasun Ekintzen Plan bat prestatu du. Planak sail guztiei eragiten die, hasi energia eraginkortasunarekin, erakusketen kudeaketarekin eta bai programa publikoen bai hezkuntza-jardueren antolakuntzarekin lotura zuzena dutenetatik, eta bisitariekin, Dendarekin edo Jatetxearekin zerikusia dutenekin buka. Planak, energia-eraginkortasuna hobetzeko ekintzak sustatzeaz gain, ingurumen-inpaktua minimizatzen duten ekimenak planteatzen ditu, eta 2030an neutraltasun klimatikoa lortzea du azken konpromisoa.

Aldaketa horien guztien motorra Gu-Zero taldea da. Taldea 2021ean sortu zen, erakundeko arlo ezberdinetako kideek osatzen dute, eta bere xedea langileak, hornitzaileak eta eragile sozialak informatzea, sentsibilizatzea eta inplikaraztea da, baita Iraunkortasun Ekintzen Planean jasotako ekimenak bultzatzea ere.

• Hondakinak Prebenitzeko Europako Astea. Azaroaren 18tik 26ra, Guggenheim Bilbao Museoak Hondakinak Prebenitzeko Europako Astean (EWWR) parte hartuko du, eta bi ekintza berritzaile garatuko ditu, murrizketan, berrerabilpenean eta birziklatzean oinarrituta.
  Altzari museografikoa murrizteko eta berrerabiltzeko ekintza. Birziklatzeko ohitura handirik ez duen ingurune batean, hondakinak murrizteko eta materialak berrerabiltzeko jarduera ezartzeko helburuarekin, Guggenheim Bilbao Museoak erabaki zuen Malagako Piccasso Museoari eskatzea Picasso Eskultore. Materia eta gorputza erakusketarako behar izan diren 29 beira-arasa klimatizatuak. Beira-arasen diseinuaz eta fabrikazioaz erakusketaren lehen egoitza arduratu zen; hots, Malagako Picasso Museoa, eta, altzari horiek eraikitzeko konplexutasuna eta horren kostu altua kontuan hartuta, berrerabiltzea erabaki zen. Lortutako akordioaren barnean eta, erakusketa Guggenheim Bilbao Museoan amaitu ondoren, beira-arasak Malagara itzuliko dira, behar diren beste erakusketa batzuetan berriz erabiltzeko.
  Street Marketing ekintza, Iberdrolak babestua. Yayoi Kusama: 1945etik gaurdaino erakusketan zehar Museoko urmaelak estali zituzten eta artistaren lana identifikatzen zuten tanto ikonikoak material jasangarriarekin egin ziren, eta birziklatu egin dira etxetresna elektrikoen atzealdeak egiteko; era horretan, ekonomia zirkularra bultzatu da.
• WAF International Symposium. Urriaren 3an, Olafur Eliassonek eman zion buru WAF Symposium ekimenari, hau da, ingurumenaren jasangarritasunerako nazioartean diren estrategiarik berritzaileenei eskainitako jardunaldi emankorrari. Sinposioa World Art Foundations-ek (WAF) antolatu zuen Guggenheim Bilbao Museoarekin lankidetzan, eta, bertan, museoetako eta arte-fundazioetako liderrak bildu ziren, ingurumen-jasangarritasunerako dituzten estrategiak aurkezteko, jardunbide egokiak partekatzeko eta parte-hartzaileei jasangarritasunerako bidea egiten hasteko erantzunak eta irtenbideak emateko helburuarekin.
• Ibilgailu elektrikoak kargatzeko zutoinak. Ekainaren 5etik aurrera Guggenheim Bilbao Museoak Iberdrolak hornitutako lau zutoin bikoitz ditu inguruan ibilgailu elektrikoak kargatzeko. Horrela, garraio mota horren erabilera erraztuko da, eta kutsatzaileak eta berotegi-efektuko gasak isurtzea saihestuko da.
• Guggenheim Bilbao Museoa Gallery Climate Coalition – GCC erakundeko kide.Museoen sektorean ingurumen-inpaktua murrizteko lanean diharduten artearen arloko erakundeen nazioarteko komunitate horretako Kide Aktibo bihurtu den lehen museoa da espainiar estatuan.
• Uniforme berrien aurkezpena. Martxoaren 22an Museoaren uniforme berriak aurkeztu genituen. Ecoalf etxeak birziklatutako materialez egindako uniformeok jantziko dituzte aurrerantzean txarteldegian, informazio-mahaietan eta Denda-Liburudendan bisitariak artatzen dituzten langileek, baita segurtasun-langileek ere. Uniforme berria hautatzerakoan, jantzien diseinuaren kalitatea, erosotasuna eta moldakortasuna ez ezik, jasangarritasuna ere oso kontuan hartu zuen Museoak, bere jardunaren ingurumen-inpaktua maila guztietan minimizatzeko erabakiarekin aurrera jarraitzeko. Ildo horretan, Ecoalf marka hautatu da etxe horrek zirkularitatearen alde egiten duelako materialen berrikuntzaren bitartez.
• Museum Next. 2022ko abuztuan, Daniel Vegak, Museoko Erakusketa eta Kontserbazioko Zuzendari Teknikoak, Green Museum Summit jardunaldian parte hartu zuen, eta Museoak aldi baterako erakusketak garatzerakoan lantzen dituen estrategien eta ekimenen berri eman zuen bertan.
• International Climate Control Conference. En diciembre de 2022, la organización presentó en este foro internacional a la comunidad de museos sus nuevos estándares más flexibles de control climático de las obras de arte.
• LED teknologia Museoaren argiztapenean. 2015 eta 2021 artean, Museoak goitik behera aldatu zuen argiteria eta LED teknologiadun argia jarri zuen; aldaketa horri esker, erakundearen karbono-aztarna nabarmen murriztu da, atmosferara urtean 350 tona CO2 inguru isurtzea saihesten baita.
• Jeff Koons artistaren Puppy zaharberritzea. 2021eko azaroan, Jeff Koons artista estatubatuarraren Puppy lore-eskultura zaharberritzeko lanak amaitu ziren. Egindako lanen artean, ureztatze-sistema automatizatu zen eta plubiometro digital bat instalatu, artelanak behar duen ur-kontsumoa optimizatze aldera. Modu horretan, baliabide naturala arduraz erabiltzeaz gain, aurreztu egiten da piezaren mantentze-lanetan.