Diseinatuko gune berriak

Hezkuntza egitarauari, merkataritza eta merchandising jarduerei eta ostalaritzari eskainitako gune berriak izango ditu Guggenheim Bilbao Museoak 2014an. Denda-Liburudenda egungo kokalekutik 103B aretora mugitzearen ondorio dira gune horiek. Ekimen hau 2013–2014ko Plan Estrategikoaren barruan dago, eta helburu ditu: hezkuntza jarduera berrietarako leku bat izatea; Museoko Denda ikusgarriagoa egitea eta ondorioz bezero kopurua handitzea; eta gastronomia eskaintza zabaltzea.

Denda-Liburudenda berria gaur egungo 103B aretoan egongo da. Gune horretatik irteten direnez bisitariak, iritsi-errazagoa izango da. Gaurko kokagunean ez bezala, solairu bakarra izango du Dendak. Gune zabala izango da eta atalka egongo da banatuta; liburuak, paperezko eta bulegoko salgaiak, arropa, diseinu-objektu eta apaingarriak egingo dira salgai. Libre geratuko diren hiru solairuetatik bat, kaleko mailan dagoena, Bistró Guggenheim Bilbao jatetxea handitzeko erabiliko da; zehazki, tabernarako gune independentea egingo da, eta horrela beste ordutegi bat izan dezake, bezeroen beharrei hobeto egokitzeko. Beste bi solairuak hezkuntza jarduerak hartuko dituzte; azken hilabeteotan proba gisa abian jarri diren, eta arrakasta handia izan duten, honako hauek, besteak beste: Baby Art, Artearen Izkina, arkitektura tailerrak, helduentzako tailerrak eta abar.

Gune berri hauen arkitekturak gainerako eraikinaren diseinuarekin koherentzia gorde dezan, Frank Gehryk onartu egin zuen proiektua taxutzea. Gehryk Bilboko IDOM ingeniaritza-enpresa izendatu du arkitekto betearazle gisa. Lanetarako lehiaketa lehenbailehen deituko da eta datorren udaberrirako lanak amaituko dira, ustez.

Bilbao, 2013ko urriaren 7an