17 maiatza 2013
Erakusketa itxita
Azken egunak Bizitako arkitektura eta Historiaren istorioak erakusketak ikusteko, Guggenheim Bilbao Museoaren hirugarren solairuan
Maiatzaren 19an, igandean, itxiko du Guggenheim Bilbao Museoak Bizitako arkitektura erakusketa eta zortzi egunen buruan, maiatzaren 26an, Historioaren istorioak. Lehenengoa 2012ko irailaren 20an ireki zen eta arkitektura nozioaren inguruko hausnarketa da. Arkitektura zer den aztertzen du, eta aintzat hartzen du bizitzeko egokiak diren eraikinez edo eraikuntzez gain, hiriak, kaleak, kale-altzariak eta, finean, gizonak eginiko guztia dela arkitekturak. Horiek guztiek arkitekturak guk eraikitako iragana eta orainaldia eta besteekin ditugun harremanak iradokitzeko gaitasuna dutela ere ikertzen du. Bost nazioarteko egileren sei lan daude erakusketan, guztiak ere Guggenheim Bilbao Bildumarenak. Artistok lekuek, tokiek, eraikinek, narrazioak eratzen dituztela —dagoeneko zehaztutakoak nahiz ikusleek sortzear daudenak— aditzera eman nahi dute, eta ideia horretan hausnartzera bultzatu. Erakusketa honen harira, Guggenheim Bilbao Museoak ondorengo lanak aurkeztu ditu lehen aldiz: Liam Gillick artista britainiarraren Nola jokatuko duzu? Sukaldeko katu bat hizketan (How are you going to behave? A kitchen cat speaks, 2009); Doris Salcedoren Titulurik gabea (2008); Mona Hatoumen Gure etxea (Home, 1999); eta Pello Irazuren Bizitza formak 304 (Life Forms 304, 2003). Erakusketa osatzeko, Cristina Iglesiasen Titulurik gabea (Alabastro gela) [Sin título (Habitación de alabastro), 1993,] eta Titulurik gabea (Sareta II) [Sin título (Celosía II), 1997] daude.
Historiaren istorioak 2013ko urtarrilaren 22an ireki zen eta Guggenheim Bilbao Bildumako bi lan nagusi aurrez aurre jarri dira: bata Cy Twomblyrena eta bestea Georg Baselitzena. Bi lanotan egileek bizitako istorioak txertatu dituzte, eta, halaber, pertsonaia historiko jakin batzuen nondik norakoak berraztertu dituzte keinuz betetako arte-lengoaia erabiliz; halere, ez zaizkie espresionismoei lotzen. Aztertutako historiaren aldiak bata bestetik oso urrun daude, gainera. Bai Baselitzen bai Twomblyren lanak oso bestelakoak dira artista garaikide jakin batzuek gertakizun historikoetatik abiatuta sortu ohi dituztenekin: ez dute historia bereganatzen ezta berregiten errealitatea beste ikuspegi batetik edota beste modu batean agertzeko, eta ez dituzte gertakizun historikoak berrinterpretatzen; aitzitik, gertakizun historikoetan oinarritutako istorioak egiten dituzte, eta horiek artistaren ikuspuntutik kontatzen. Zirikatzaileak dira, alabaina, artearen alorrean, ez politikarenean.
Erakusketa biak itxi ondoren, Guggenheim Bilbao Museoak ekainaren 14an irekiko du Barroko neurrigabea: Cattelanetik Zurbaránera. Bizitza ezegonkorraren adierazpideak. Erakusketa hori Kunsthaus Zürichek eta Guggenheim Bilbao Museoak lankidetzan antolatu dute eta arte garaikidearen eta XVII. mendeko artelanen arteko erkaketa egingo da. Barrokoaren nozioa estereotipo formaletatik aldentzen saiatuko da, baita haren estiloa deskribatzeko ohiko moduetatik urruntzen ere; bizitzaren berariazko “neurrigabetasuna” eta ezegonkortasuna azpimarratuko ditu, hain zuzen, “bizitza ezegonkorraren adierazpideak” agerian jartzeko.
Bilbon, 2013ko maiatzaren 17an
Guggenheim Bilbao Museoaren inguruko informazio guztia eskuragarri dago hemen www.guggenheim-bilbao.eus (prentsa eremua).
Bidali mezu bat xehetasun guztiekin helbide honetara: media@guggenheim-bilbao.eus
Mezuan informazio hau jarriko da: grabazio-mota, eguna, ordua eta iraupena, zein den grabazioaren helburua (eraikina, erakusketak), elkarrizketa behar duen edo bestelako informazio interesgarria.
Behin eskaera onartuta, Museoak taldea osatzen duten kide guztiei buruzko datuak jasoko ditu, filmazioa egin aurretik.
Ikus-entzunezko produkzioetan Museoaren irudia erabiltzeak tarifa bat izan dezake. Eskaera bakoitza Irudi Batzordeak aztertuko du. Eskaera baten berrikuspena 3 egun baliodunetik 2 astera arte luza daiteke. Saioak aldez aurretik planifikatzea gomendatzen dugu.
Irudiak lortzeko, sar zaitez hemen eta deskargatu materiala. Premiazko eskaeretarako, posta elektronikoaren bidez edo telefonoz jar zaitezke harremanetan.
Irudiak beren egilearen izenarekin erreproduzitu behar dira, distortsionatu, mutilatu edo aldatu gabe. Irudi horiei beste erabileraren bat eman behar bazaie, Museoaren berariazko baimen idatzia beharko da.
Informazio guztia web orrialdeko Prentsa sailean eskura daiteke, erakusketen atalean.
Prentsa-txartela aurkeztu behar baduzu Museoko leihatiletan, sarrera doan eskuratuko duzu. Kontuan izan kazetariei Museoa doan bisitatzeko aukera ematen zaiela, museoaren jarduerei, ekitaldiei eta erakusketei publizitatea ematearen truke.
Bidali mezu bat hedabideari eta kazetariari buruzko informazio osoarekin media@guggenheim-bilbao.eus helbidera.