Guggenheim Bilbao Museoak diseinuko bi Laus sari irabazi ditu

Guggenheim Bilbao Museoak bi ADG Laus jaso ditu; diseinu grafikoko saririk garrantzitsuenen artean daude horiek estatu mailan, eta iragarki-piezen kalitate kontzeptual eta formala saritzen dute, bai eta haien funtzionaltasun, berrikuntza eta itxura ere. Sari-banaketa ekainaren 30eko gauean izan zen Bartzelonan, eta 2017ko edizioan saria jaso duten Museoaren bi piezak hauek izan dira: Andy Warhol: Shadows erakusketako kanpaina grafikoa, Madrilgo Zapping agentziarena, eta Museoaren XX. Urteurrenaren microsite-a, Lin3s eta Hopper-ink euskal agentziek egindakoa.

2016an Museoan egon zen Andy Warholen erakusketa sustatzeko grafikak, alde batetik, Zilarrezko Laus saria lortu du Kanpoko Publizitate mailan. Pieza original eta harrigarria da, diseinu-irizpide soil, argi eta oso estetikoa baliatuz Shadows bezalako artelan eskerga bat modu oso bisualean irudikatzen duena. Kanpaina hori prentsa, bideo eta kanpo-euskarrietarako moldatu zen, hala nola, markesina edo banderatxoetarako.

Bestalde, Museoaren XX. Urteurrenaren microsite-ak Brontzezko Laus saria jaso du Digital –webgune instituzionala mailan, Museoaren barrualdeko forma sigi-sagatsuak gogorarazten dizkigun diseinu garbi eta txundigarriagatik; gainera, erabiltzaileak forma horiekin jolasteko aukera du edozein gailutik, teknologia berritzaile bati esker. Microsite horrek toki nabarmena du Museoaren webgunean, eta bertan egongo da 2017ko urria arte, orduan beteko baititu Museoak 20 urte. https://xx.guggenheim-bilbao.eus/eu/

FAQ

Nola lortu dezaket baimena Guggenheim Bilbao Museoaren barrualdean nahiz kanpoaldean argazkiak ateratzeko edo filmatzeko?

Bidali mezu bat xehetasun guztiekin helbide honetara: media@guggenheim-bilbao.eus

Mezuan informazio hau jarriko da: grabazio-mota, eguna, ordua eta iraupena, zein den grabazioaren helburua (eraikina, erakusketak), elkarrizketa behar duen edo bestelako informazio interesgarria.

Behin eskaera onartuta, Museoak taldea osatzen duten kide guztiei buruzko datuak jasoko ditu, filmazioa egin aurretik.

Ikus-entzunezko produkzioetan Museoaren irudia erabiltzeak tarifa bat izan dezake. Eskaera bakoitza Irudi Batzordeak aztertuko du. Eskaera baten berrikuspena 3 egun baliodunetik 2 astera arte luza daiteke. Saioak aldez aurretik planifikatzea gomendatzen dugu.

Nola lor ditzaket erakusketen eta eraikinaren irudiak komunikabide batean argitaratzeko?

Irudiak lortzeko, sar zaitez hemen eta deskargatu materiala. Premiazko eskaeretarako, posta elektronikoaren bidez edo telefonoz jar zaitezke harremanetan.

Irudiak beren egilearen izenarekin erreproduzitu behar dira, distortsionatu, mutilatu edo aldatu gabe. Irudi horiei beste erabileraren bat eman behar bazaie, Museoaren berariazko baimen idatzia beharko da.

Nola lor dezaket erakusketa zehatz baten press kit bat?

Informazio guztia web orrialdeko Prentsa sailean eskura daiteke, erakusketen atalean.

Nola lor dezaket prentsa-baimen bat?

Prentsa-txartela aurkeztu behar baduzu Museoko leihatiletan, sarrera doan eskuratuko duzu. Kontuan izan kazetariei Museoa doan bisitatzeko aukera ematen zaiela, museoaren jarduerei, ekitaldiei eta erakusketei publizitatea ematearen truke.

Nola jaso dezaket Museoaren erakusketei eta gaurkotasunari buruzko informazioa?

Bidali mezu bat hedabideari eta kazetariari buruzko informazio osoarekin media@guggenheim-bilbao.eus helbidera.