Hasiera: Munich

305–306 Aretoa

Vasily Kandinskyren haurtzaroa bere jaioterrian, Moskun, eta Odessan (orduan Errusia eta, orain, Ukraina) igaro zen, non bere familiak artearekiko eta musikarekiko zaletasuna piztu zion. Zuzenbidea eta Ekonomia ikasi zituen, baina 1895ean norabidea guztiz aldatu eta Moskuko Kushnerev arte grafikoen lantegiko arduradunetako bat bihurtu zen. Urtebete geroago, inpresionismo frantsesaren erakusketa bat eta Wagnerren opera bat ikusi izanak akuilatuta, Munichen bizitzea erabaki zuen, margolaritzan jarduteko. Errusiako oroitzapenak, hango altzarien apainketa alaiak eta nekazarien etxeetako deboziozko irudiak esaterako, bai eta historizismo erromantikoa, poesia lirikoa, folklorea eta fantasia dira Kandinskyren lehen lanen osagaiak.

Kandinsky eta bere neska-laguna, Gabriele Münter artista alemaniarra, bidaian ibili ziren Europan eta Afrika iparraldean barna 1904 eta 1907 artean, 1908an Munichera itzuli aurretik. Grabatuak berezkoak dituen konposizio-elementuak, nola diren argi-argi delineatutako formak eta perspektiba lautua, nagusitzen dira 1908 eta 1909 artean sortu zituen paisaia bavariar koloretsuetan. Margolan hauek oso bestelakoak dira egileak neoinpresionismoaren ildotik egin zituen aurreko ariketen aldean, non bere lanak kolore-ukitu txikien bidez eraikitzen zituen.

Munichen zegoen bitartean, hiriko abangoardiako talderik garrantzitsuenak gidatu zituen Kandinskyk, adibidez Falangea (Phalanx) izenekoa eta Municheko artisten elkarte berria (Neue Künstlervereinigung München), eta funtsezko hainbat tratatu argitaratu zituen, besteak beste Über das Geistige in der Kunst (Espirituzkoa artean ). 1911n Kandinskyk eta Franz Marc-ek Der Blaue Reiter (Zaldun Urdina ) sortu zuten, kolorearen adierazkortasun-ahalmenean eta erresonantzia sinbolikoan —erresonantzia espirituala, askotan, haien ustez— interesatuak zeuden artista-elkarte heterogeneoa.

1913an, Kandinskyk lehenago erabili ohi zituen motiboak —zaldia eta zalduna, muino uhinduak, dorreak eta zuhaitzak— lerroaren eta kolorearen mendean jarri zituen. Ingerada kaligrafikoek eta forma erritmikoek beren jatorri figuratiboen gero eta arrasto gutxiago erakusten zuten heinean, abstrakzioan barneratzen eta “paletaren botere ezkutua” deituko zuena hasi zen Kandinsky formulatzen.