II Sekzioa - Dresdeneko urteak (1916–1923)

Kokoschka Berlinen bizi izan zen 1910etik 1916. urteko amaiera arte, hau da, Paul Cassirer (1871–1926) galeristarekin kontratu bat sinatu zuen arte. Gerraren ondorioz, depresio latz batek jota egon zen, eta Dresdeneko sendategi batean artatu zuten. Hiri horretako giro artistikoan parte hartu zuen gero, batez ere antzerkiaren eremuan, eta pieza dramatikoak sortzen jarraitzeko hauspoa eman zion horrek. 1919an, Arte Ederren Akademian irakasle jarduteko aukera eskaini zioten, eta horretan aritu zen 1923ra arte.

Dresdenen zegoela, Kokoschka museoetara joaten zen maiz, Rubens, Tiziano eta Rafaelen maisulanak ikustera. Garai hartan, adierazpide plastiko berrien bila zebilen, eta hau zerabilen buruan: “espazio eta sakontasun piktorikoaren arazoak konpontzeko, kolore puruak erabiltzea, mihise lauaren misterioa gainditu asmoz”. Garai horretako obretan kolore bizi eta argitsuak erabili zituen, elkarren ondoan trebeki jarrita eta irudikatutako formetara modu askean lotuz.