LEHOIA NAIZ, ZUHAITZA NAIZ

Proiektu honen helburua sentimenduak adierazten eta kudeatzen ikastea zen, ongizate emozionala hobetuz. Haren garapenean sortu ziren beste kontzeptu batzuk espazioaren kontzientzia eta iraunkortasuna izan ziren.

Parte-hartzaileek animalia ezberdinak eta haien ezaugarriak bereizi zituzten: lagunkoiak, basatiak, lasaiak, azkarrak, pozoitsuak, eta banaka hausnartu zuten ea ezaugarri horiek, uneren batean, bat zetozen beren jarrera pertsonalekin. Horrela, animalia horiekin identifikatzera jolastu ziren, emozioei eta portaerei izenak eta adjektiboak emanez. Adjektiboak idatzi zituzten koloretako letrak ebakiz eta animalia bakoitzaren maskarak sortu zituzten, beren aldartearen arabera jarri zirenak: alai sentitzen banaiz, behiz jantziko naiz eta oldarkor sentitzen banaiz, katuz. Maskarekin emozioak eta portaerak antzeztu zituzten.

Kolore desberdinetako hamalau esferak arteari eta emozioei buruzko nozioak biltzen dituen proposamen artistikoa osatzen dute. Horrek kolore-kode batzuk adostea ekarri zuen, hainbat sentimenduri kolore desberdinak emanez eta horiekin maché paperezko esferak koloreztatuz, emozio esferikoen katalogo bat sortzeko. Saioetan, klase bakoitzaren hasieran, nola sentitzen ziren erakusten zuten esferak aukeratzen zituzten eta aurpegiaren aurrean jartzen zituzten. Horrela, kolorearen bidez, eguneko sentimenduak erakusten zituzten eta pentsatuz ea aldartea alda zitekeen hura adieraztean eta partekatzean.

Azkenik, ekintza bat antolatu zuten, ikasleek zuhaitzen azala jantzi eta baso bihurtzeko. Horretarako, zuhaitzen azalaren antzeko testurak margotu zituzten tamaina handiko kartoietan, eta bertan bildu eta giza enbor bihurtu ziren. Ekintza bat ere egin zuten espazioan zehar mugituz, zuhaitz dinamikoz osatutako baso bat osatuz. Proiektu honen bidez, beren gorputz- eta espazio-kontzientzia zabaldu zuten, gorputza hobeto ulertuz besteekiko eta inguruarekiko.