Artea Ikasbide 2023
2023.06.13 - 2023.09.17
Ekainak 13–irailak 17, 2023
Erakusketa honek 2022–2023 ikasturtean zehar Artea Ikasbide hezkuntza-programaren baitan 6 eta 12 urte bitarteko ehun ikasle baino gehiagok sortutako obrak jartzen ditu ikusgai. Ekimenak 25 urte bete ditu orain, eta urte horietan guztietan bide berriak urratuz joan da EAEko ikastetxeetan, pedagogia-eredu berezi baten bidez Lehen Hezkuntzako curriculuma ikuspegi artistikotik jorratuta.
Abentura honetan, sei ikastetxetako ikasleek Elssie Ansareo, Ibon Garagarza, Zaloa Ipiña, Nerea Lekuona, Maider Lopez eta Ibon Saenz de Olazagoitia artistak izan dituzte bidelagun hogei saiotan zehar. Saio horietan jorratu dituzten proiektu artistikoetan curriculumeko gaiak izan dituzte aztergai, hala nola jasangarritasuna, uraren zaintza edo emozioen adierazpena, eta esperientziak euren sormen-prozesuetan parte hartzera bultzatu ditu ikasleak, pentsatzera, balioestera, aukeratzera, probatzera, zalantzan jartzera eta dibertitzera; batzuetan baita galtzera ere eta, jakina, huts egitera, akatsik gabe ez baitago aurrerapenik.
Erakusketak sormen-prozesu horren zikloa ixten du, eta egindako lana jendaurrean aurkezten. Erakusketa bisitatzen duten herritarrek ustekabeko aukera izango dute ikuspuntu original eta freskoez gozatzeko, ideia iradokitzaileak aztertzeko eta ekimeneko partaideek duten deskubritzeko eta sortzeko grina partekatzeko.
Aretoa: Hezkuntza-gune
Artistak
Ansareo, Elssie
Garagarza, Ibon
Ipiña, Zaloa
Lekuona, Nerea
López, Maider
Sáenz de Olazagoitia, Ibon
Erakusketa
ARGITU GABEKO IZAERA
3. mailako 14 ikasle, Judimendi ikastetxea, Vitoria-Gasteiz
URAREN BIDEAK
1. eta 6. mailako 34 ikasle, Lauaxeta ikastetxea, Laukiz
GALERIA IBILTARI IRAUNKORRA
2. mailako 19 ikasle, San Pedro Apostol ikastetxea, Bilbo
LEHOIA NAIZ, ZUHAITZA NAIZ
6. mailako 16 ikasle, Presentación de María Ikastetxea, Donostia/San Sebastián
ZER ETORKIZUN DUGU ZAIN?
5. mailako 23 ikasle, Amor Misericordioso Ikastetxea, Bilbo
EMOZIOAK MARGOTZEN
5. eta 6. mailako 12 ikasle, Jose Orbegozo Ingeniaria Ikastetxea, Bilbo
Artea ikasbide 25 urte
Ba al
zenekien...?
25 URTE
1998an, Artearen bidez ikasten lehenengo erakusketa egin genuen. Hezkuntza programa berezi honen balio handiaz konbentzituta, bere azken emaitza Museoan erakutsi nahi izan genuen.
ERAGINA
Artea ikasbide programan parte hartzeak eragin positiboa du ikasleen garapen pertsonalean, akademikoan, sortzailean eta sozialean. Urtero inkestak egiten dira, programa parte hartu duten ikasle, irakasle eta artistentzat zer izan den jakiteko.