Guggenheim
Sarrera

DESKARGATU INPRIMATZEKO BERTSIOA

Qiu Zhijie, Mapa: "Artea eta Txina 1989 ondoren: Munduaren antzerkia" (Map of “Art and China after 1989: Theater of the World”), 2017. Tinta paper gainean, zeta gainean muntatua, sei panel, 240 x 720 cm guztira. Solomon R. Guggenheim Museum, New York, Artistaren dohaintza, honek emandako funts gehigarriekin: International Director’s Council T31.2017 © Qiu Zhijie.

 

 

 

 

 

 

 

 

 

 

 

 

 

 

Argazkia: artistaren eskaintza; eskuina: Qiu Zhijie, 1. eginkizuna: “Orkidearen Pabiloiaren Hitzaurrea” 1.000 bider kopiatzea (Assignment No. 1: Copying the “Orchid Pavilion Preface” 1,000 Times), 1990–95. Koloretako bideoa, mutua, 35 min. Artistaren eskaintza; tinta paper gainean, 70 x 160 cm. Chang Tsong-zung-en bilduma © Qiu Zhijie

Artea eta Txina 1989 ondoren: Munduaren antzerkia Txinako arte garaikideari buruzko erakusketa handi bat da, eta Txinaren nahiz munduaren azken urteotako historiaren aldi eraldatzaileena aurkezten digu: 1989tik 2008ra bitartekoa. Gerra Hotza amaitu eta globalizazioa agertu zenetik Txina munduko potentzia gisa gorantz hasi eta 2008an Pekinen Joko Olinpikoak izan ziren arte luzatzen da aldi hori. Erakusketan lehen mailako 70 bat artista eta talde txinatarrek hartzen dute parte, eta 150 obra esperimental inguru ikus daitezke, era guztietakoak: zinema eta bideoa, instalazioak, pintura, eskultura, argazkilaritza eta performancea, arte sozialki konprometitua eta arte aktibista. Erakusketa sei atal tematiko eta kronologikotan banatuta dago eta Museoaren bigarren solairu osoa hartzen du.


“Denok dugu guztiaren mapa bat buruan. Adibidez, Hong Kong: denok Hong Kongen mapa pertsonalak paperean irudikatuko bagenitu, elur-malutak bezain desberdinak izango lirateke mapa horiek guztiak[1].”

Erakusketa ikusi ondoren, Qiu Zhijie artistak Mapa: "Artea eta Txina 1989 ondoren: Munduaren antzerkia" obra sortu zuen (Map of “Art and China after 1989: Theater of the World”). Tintaz margotuta dago, paperean, eta sei panelek osatzen dute; haietan, erakusketak aztertzen dituen mugimendu artistiko eta politikoen historia azaltzen da [2]. Aurretik ere egin zituen Qiuk zenbait mapa kontzeptual, ideiak eta kontzeptuak islatzeko, toki fisikoen ordez. Gizakiok mundua irudikatzeko erabiltzen ditugun baliabide nagusietako bat da kartografia. Mapen bidez, ezezaguna dena ikusgai eta ulergarri bihurtzen da. Qiuk kartografiaren historiak eta teknikak darabiltza erakusketaren gaia eta denboraldia irudikatzen dituen lurralde kontzeptual bat sortzeko, baina baita alegiazko tokiak irudikatzeko antzinako tradizio txinatarra ere.

Qiu Zhijie 1969an jaio zen Fujian probintzian (Txina) eta txikitatik landu zuen kaligrafia txinatarra; lehenengo lanetatik gaur egun arte erabili du arte modu tradizional hori bere jarduera artistikoko baliabide garrantzitsu eta gai nagusi gisa. Kaligrafia idazketa modu bat da, pinturaren oso antzekoa den teknika bat; pintzel leun bat tinta likido beltzean bustitzen da, eta paperean edo zetan zabaldu. [3]

  1. eginkizuna: “Orkidearen Pabiloiaren Hitzaurrea” 1.000 bider kopiatzea (Assignment No. 1: Copying the "Orchid Pavilion Preface" 1,000 Times, 1990–95) obran, Qiuk kaligrafia txinatarraren historiako obra ospetsuenetako bat kopiatzeko prozesua deskribatzen du. Wang Xizhi-ren (K.o. 303–361) Orkidearen Pabiloiaren Hitzaurrea IV. mendean konposatu zen, eta kaligrafia txinatarreko giltzarrietako bat da; azken 1.500 urteotan, ikasleak kaligrafia txinatarra menperatzen saiatu dira errepikapenaren bidez. Qiuk mila aldiz kopiatu zuen obra ospetsu hori, baina, orri desberdinetan kopiatu ordez, orrialde berean kopiatu zuen behin eta berriro, eta, azkenean, hitzek tinta beltzeko masa sendo bat osatu zuten. Obraren bilakaera ikusteko, Qiuk bideoz grabatu zuen prozesu osoa. Idazketa-prozesuan jartzen duenez arreta, eta ez edukian, Qiuk komunikaziotik artistaren sortze-prozesura eramaten du kaligrafia-jardueraren ardatza.
Galderak

Erakutsi Qiu Zhijieren obra, Mapa: “Artea eta Txina 1989 ondoren: Munduaren antzerkia”.

Eskatu ikasleei obra arretaz behatzeko; hura ikusgai duen erakusketa bera (Artea eta Txina 1989 ondoren: Munduaren antzerkia) da gaia. Zer izen eta gertakari ezagutzen dituzte? Zein ez?

Eska iezaiezu Qiuren mapa eta ezagutzen dituzten beste mapa batzuk alderatzeko. Zer antzekotasun edo desberdintasun daude obra honen eta erabili dituzten beste mapa batzuen artean?

Erakutsi Qiu Zhijieren obra, 1. eginkizuna: “Orkidearen Pabiloiaren Hitzaurrea” 1.000 bider kopiatzea (1990–95). Galdetu ikasleei zer erreakzio izan duten obra ikustean, eta idatzi haiek esandakoa.

Erakutsi antzeko obra bat sortzeko modua erakusten duen dokumentazio fotografikoa (https://i.pinimg.com/originals/ 80/73/59/807359c4fc 9cc93c2c096071 eed4fca5.jpg). Galde iezaiezu ea obra sortzeko prozesua ulertzeak aldatzen duen hura ikustean duten erreakzioa, eta, hala bada, nola.

Kaligrafia txinatarra sei mila urtean baino gehiagoan landu da eta Txinan gehien miresten den arte modua da. Qiuk urte askoan aztertu zuen antzinako modalitate artistiko hau, baina beste ikuspegi batetik heltzen dio gaiari. Kaligrafia egiak eta esanahiak adierazteko bitarteko gisa erabili ordez, aldi baterako prozesu gisa ikusten du, orri batean markak egiteko ekintza gisa. Qiuk arte txinatar garaikidean behin eta berriro agertzen den gai bat aztertzen du: nola uztartu kultura txinatar tradizionala eta pentsamolde eta jardun garaikideak? Galdetu ikasleei haien ustez obraren zer alderdi diren tradizionalak eta zer alderdi dauden pentsamolde garaikideagotik hurbil.

Jarduerak

Qiuk hitzez adierazi ohi diren kontzeptuak hartu eta irudi bihurtzen ditu, eta irudi horiek hierarkiak, kalezulo itsuak eta ironiak erakusten dituzte. Batzuetan, ideiak eta kontzeptuak horrela ilustratzeari mapa mentala esaten zaio, eta informazioa egituratzen, beste ikuspegi batzuk hartzen eta pentsamolde lineala saihesten laguntzen duen tresna grafikoa da.

Eskatu ikasleei interesatzen zaien gai bat aukeratzeko; adibidez, liburu jakin bat, toki bat edo ideia bat. Nola adierazi ahal izango lukete, grafikoki, gai horri buruz dakitena, besteek uler dezaten? Animatu ikasleak irudikapen grafiko horiek paperean jartzera, grafitozko eta koloretako arkatzak erabilita. Amaitzen dutenean, eska iezaiezu buruko mapak elkarri erakusteko eta saiatzeko esaten zer neurritan izan duten arrakasta besteei beren ideiak adieraztean.

Honela dio Qiuk sekzio honi hasiera ematen dion aipuan: “Denok dugu guztiaren mapa bat buruan. Adibidez, Hong Kong: denok Hong Kongen mapa pertsonalak paperean irudikatuko bagenitu, elur-malutak bezain desberdinak izango lirateke mapa horiek guztiak”. Iradoki gai bakarra ikasleei; une horretan ikasten ari diren gai bat izan daiteke, edo laster izango den gertakari edo jairen bat, edo zuk aukeratzen duzun gairen bat (adibidez, elikadura osasungarria edo energia aurreztea). Papera eta grafitozko edo koloretako arkatza hartuta, ikasleek beren ideien mapa irudikatu behar dute. Amaitzen dutenean, eska iezaiezu mapa mentalak elkarri erakusteko. Zer lotura dute emaitzek eta Qiuren baieztapenak? Eskatu ikasleei mapa mentalen arteko antzekotasunak eta desberdintasunak azaltzeko.

Bakarka ez ezik, Qiuk beste artista batzuekin batera ere sortu ditu obrak; tailerrak ere eskaintzen ditu, eta, haietan, zati mugikorrak dituzten obrekin lan egitera bultzatzen ditu partaideak. Lankidetzan egindako mapa horiek mundua ulertzeko modu berriak asmatzea dute helburu. [4] Animatu ikasleak talde txikietan lan egitera gai bat aukeratzeko eta hura grafikoki islatzen duen mapa bat sortzeko. Jarduera honetan asko eztabaidatu, planifikatu eta berraztertu beharko da, hasierako marrazkia behin betiko zirriborro bihurtzen den arte.

Txinan, umeek oso gaztetatik ikasten dute kaligrafia errespetatzen eta hartaz gozatzen. Ikastetxeek astean gutxienez kaligrafia-eskola bat ematen dute, eta ikasle bakoitzak bere kutxatila du kaligrafiako tresnak gordetzeko [5]. Pintura txinatarrarekin esperimentatzeko materiala erraz aurki daiteke, eta liburu eta bideo hezigarri asko daude arte modu iraunkor honen inguruko sarrera praktiko gisa erabili ahal izateko.

HIZTEGIA

Kaligrafia txinatarra: pintzela eta tinta erabilita paperean edo zetan idazteko modu tradizionala; tinta-pinturarekin batera, arte modu gorena da Txinan, Japonian eta Korean. [6]

Globalizazioa: nazio desberdinetako herri, enpresa eta gobernuen arteko interakzio- eta integrazio-prozesua; prozesu horrek nazioarteko negozio-egitura industrial eta finantzario bat du bereizgarri. Bereziki kapital, langile, ondasun eta ideien zirkulazio askea da nagusi globalizazioan. 1989an sortu zen terminoa, gutxi gorabehera Gerra Hotza amaitu eta Internet asmatu zen aldian; horrek “mugarik gabeko” mundu bat ekarri zuen. Globalizazioaren abantailetako bat ideiak eta pertsonak globalki trukatu ahal izatea da, eta haren ondorioetako bat, berriz, herrialde txiroen kontura enpresa multinazionalak agertzea. [7]

Instalazio artistikoa: hiru dimentsioko arte modu handia, erakusketa-espazio zehatz baterako diseinatutakoa. Maiz, instalazioa aurkitutako edo fabrikatutako material batzuez osatuta egoten da, eta material horiek muntatu egiten dira giro espezifiko bat sortzeko. [8]

BALIABIDEAK

Munroe, Alexandra (arg.), Artea eta Txina 1989 ondoren: Munduaren antzerkia (Art and China after 1989: Theater of the World), erak. kat., Solomon R. Guggenheim Museum, New York, 2017

Art Wall: Qiu Zhijie: https://www.youtube.com/watch?v=wQBRDaW9SmA

2015eko Arte Bienala: Qiu Zhijie: https://www.youtube.com/watch?v=mftkXaH6Wps

OHARRAK

[1] Qiu Zhijie, hemen aipatua: “Mapping the World: Hong Kong’s Spring Workshop Hosts Qiu Zhijie”, Art Radar, http://artradarjournal.com/2013/08/09/mapping-the-world-hong-kongs-spring- workshop-hosts-qiu-zhijie/.

[2] Ikus Munroe, Alexandra (arg.), Art and China after 1989: Theater of the World, erak. kat., Solomon R. Guggenheim Museum, New York, 2017, 108. or.

[3] Ibid., 14. or.

[4] “Mapping the World”, Art Radar

[5] Ikus Yat-Ming, Cathy Ho, The Chinese Calligraphy Bible: The Essential Illustrated Guide to Over 300 Beautiful Characters, Baron’s Educational Series, Hauppauge, New York, 2007, 10. or.

[6] Heilbrunn Timeline of Art History, Metropolitan Museum of Art, http://www.metmuseum.org/toah/hd/chcl/hd_chcl.htm

[7] http://www.globalization101.org/what-is-globalization/

[8] Merriam-Webster’s Collegiate Dictionary hiztegiaren egokitzapena (11. edizioa)

DESKARGATU INPRIMATZEKO BERTSIOA