Palms
2007John Bock Bigarren Mundu Gerraren ondoren zatitutako Alemanian hazi zen; beraz, haurtzaroa eta nerabezaroa Gerra Hotzaren konfrontazio ideologikoaren eta eraldaketa sozialaren testuinguruan igaro zituen. Gatazka belikoaren ondoren herrialdearen egoera ekonomikoa egonkortzen hasi zen bitartean, Europako erdialdean mugimendu artistiko berriak agertzen hasi ziren, arte modernoaren eta akademizismoaren seriotasuna zalantzan jartzen zutenak. Fluxus edo Vienako Akzionismoa bezalako kolektiboek eta Joseph Beuys bezalako artistek aurre egiten zieten artearen arau tradizionalei, performancearen eta ekintzaren eremura eramanez, gorputza ardatz hartuta.
Bock bere ibilbide artistikoa egiten hasi zen Alemania nazio gisa berreraiki zen bitartean, laurogeiko hamarkadaren amaieran berriro elkartu ondoren. Aurreko hamarkadetako praktika performatiboen eraginarekin, hitzaldi zentzugabeak ematen hasi zen Hanburgon Enpresen Administrazioa ikasten zuen bitartean. Handik gutxira, Arte Ederretan graduatu zen, eta haren obrak konplexuagoak egin ziren, eskultura, antzerkia, filosofia eta musika bezalako diziplinak uztartu baitzituen. Bere proposamenekin antzerki-ekintzak gauzatu zituen, bera protagonista izanik, eta era guztietako objektuekin —aurkitutako elementuak, elikagaiak, sendagaiak—betetako eszenatoki berezietan garatu zituen. Objektu horiek esanahi berriak hartuko zituzten itxura kaotikoko konfigurazioetan. Diskurtso bitxien bidez, askotan diagrama eta marrazki korapilatuekin lagunduta, publikoa interpelatuko du edozein elkarrizketa-saiakera zapuzten duen hizkuntza ulertezin baten bidez. Bideoa sartzearekin bere sormen-unibertsoa zabaldu zuen, eta bere instalazio oparoen atzealdeko oihal gisa funtzionatzen duten filmak ekoiztera bultzatu zuen.
Palms (2007) Bocken ekoizpenaren funtsezko pieza da. Obran pelikula bat eta ingurune eskultural bat konbinatzen dira. Filmean bi hiltzaile alemaniarren gorabeherak kontatzen dira; beren helburuaren bila dabiltza Kalifornia hegoaldean barrena Lincoln kabriolet batean. Bilaketak hainbat eszenatokitara eramango ditu ─Los Angelesko errepideetatik basamorturaino─ zeinu eta objektu bitxien arrastoari jarraituz. Proiekzioa neurrigabeko paisaia eskultoriko batek inguratuta egongo da, eta garro gorri eta sigi-sagatsu batzuk pelikulako autoaren antzeko baten motorretik ateratzen direla emango du, parean dena suntsituko balute bezala.
Filmak Estatu Batuetako zinemaren ohiko gaiak ekartzen ditu gogora; esate baterako, road movie-ak eta zinema beltza. Logika bihurriek eta keinu absurduek giro intrigagarri eta dibertigarria sortzen dute, narrazioak zentzu linealik eta amaierarik ez badu ere. Proiekzioaren ingurune eskultorikoa eszena batean inspiratzen da; hau da, ibilgailua matxuratu egiten da, eta protagonistetako batek “motorraren parasitoari” egozten dio errua. Era horretan, horrek istorioaren bitxikeria eta nabarmenkeria areagotuko ditu.
Esanahi itxi bat eskaini ordez, Palms anbiguoa da apropos. Haren irakurketa posibleen artean, narratiba tradizionala zalantzan jartzea (hemen logika absurdu baten bidez desafiatua) eta gure erreferenteen eraikuntzan ikus-entzunezko lengoaiak duen botereari buruzko hausnarketa aurkitzen dira. Puri-purian dagoen gaia da, irudien eta informazioaren saturazioak markatutako garai batean, kontuan izanik mundua hautemateko eta ulertzeko dugun moduak hedabideen eta teknologiaren erabateko eragina duela.
Jatorrizko izenburua
Palms
Data
2007
Teknika / Materialak
Koloretako bideo digitala, soinuarekin (59 min 14 s), autoarekin eta askotariko objektuekin Dimentsio aldakorrak