Guggenheim

Vasily Kandinsky, abstrakzioaren aitzindaria eta estetikaren teorialari ezaguna (Mosku, 1866–Neuilly-sur-Seine, Frantzia, 1944), XX. mende hasierako artistarik berritzaileenetako bat izan zen. Margolaritza mundu naturalarekin zituen loturetatik askatzeko xedea zuelarik, artistaren “barne-premian” soilik oinarritutako gai berriak aurkitzen saiatu zen, eta auzi hori bere bizitza osoan izango zuen gogoan.

1900 eta 1910eko hamarkadetan, Munichen bizi zelarik, kolorearen eta konposizioaren adierazkortasun-aukerak aztertzen hasi zen Kandinsky. Hala ere, 1914an Lehen Mundu Gerra hasi, eta Alemaniatik alde egin behar izan zuen. Bere jaioterrira itzuli zenean, Moskura, Kandinsky errusiar abangoardiaren kutsu utopikoko esperimentuak hasi zen haren pintura-hiztegian islatzen, forma geometrikoei garrantzi handia emanez, hizkera estetiko unibertsal bat osatzeko helburuarekin. Ondoren, Alemanian bueltan, Bauhausarekin elkartu zen Kandinsky, irakasle gisa. Izan ere, arte eta diseinu aplikatuko eskola haren oinarrian zegoen ustea partekatzen zuen: arteak gizakia eta gizartea eraldatzeko ahalmena zuela, alegia. Berriz ere Alemaniatik alde egin behar izan zuen 1933an, Bauhausa itxi egin baitzuten nazien presiopean, eta Kandinsky Parisko kanpoaldean finkatu zen, non, biomorfismoa baliatuz, surrealismoaren eta natura-zientzien eragina agerian uzten zuen ikonografia bat landu baitzuen.

Kandinskyren istorioak lotura estua du New Yorken 1937an eratutako Solomon R. Guggenheim Foundation-en istorioarekin, beste edozein artistarenak baino gehiago. Fundazioaren sortzailea, Solomon R. Guggenheim industria-gizona, 1929an hasi zen Kandinskyren lanak biltzen, eta hurrengo urtean Dessauko Bauhausen ezagutu zuen artista. Honako erakusketa honek fundazioak dauzkan funts zabaletatik datozen lanak aurkezten ditu, eta guztiz ilustratzen du margolariaren ibilbide garrantzitsua.

—Megan Fontanella, Arte-arduraduna, Arte moderno eta artelanen jatorria, Solomon R. Guggenheim Museum, New York

Solomon R. Guggenheim Foundation-ek antolatua, New York

Vasily Kandinsky
Lerro beltzak (Schwarze Linien), 1913ko abendua
Olio-pintura mihise gainean, 130,5 × 131,1 cm
Solomon R. Guggenheim Museum, New York, Solomon R. Guggenheim sortze bilduma, dohaintza 37.241
© Vasily Kandinsky, VEGAP, Bilbo, 2020

Baliabide esklusiboakEgin zaitez Community-ko kide eta gozatu eduki honetaz
Artista

Vasily Kandinsky 1866ko abenduaren 16an jaio zen Moskun. Bertako unibertsitatean, zuzenbide- eta ekonomia-ikasketak egin zituen 1886tik 1892ra, eta, lizentzia eskuratu ondoren, eskolak eman zituen. 1896an, uko egin zion irakasle-postu bati, eta Munichera joan zen, artea ikastera, Anton Azberekin, 1897 eta 1899 artean, Kunstakademie akademian, eta, gero, Franz von Stuckekin, 1900ean. 1901 eta 1903 artean, Kandinskyk Phalanx taldearen arte-eskolan irakatsi zuen. Talde hura berak sortu zuen Munichen, beste batzuekin batera. Bere ikasleetako bat, Gabriele Münter, izan zuen neskalagun 1914ra arte. 1902an, Kandinskyren lehenengo erakusketa egin zen Berliner Secession elkarteak antolatua, eta artistak bere lehenengo xilografiak sortu zituen. 1903an eta 1904an bidaiak egin zituen Italia, Herbehereak eta Afrikako iparraldea ezagutzeko eta Errusiara ere bueltatu zen bisitan. 1904tik aurrera, Parisko Salon d’Automne-n (Udazkeneko erakusketa) egin zituen erakusketak.

Artistak buruzko informazio gehiago
Ba al zenekien...?

Etengabeko ikerketa

Eremu didaktiko honetan, Vasily Kandinskyren bizitzan eta jardun artistikoan eragina izan zuten pertsona, toki eta gertakariek hartzen dute garrantzia.
Lortu informazio gehiago
Gure Dendako produktuak, lotura dutenak
Kandinsky katalogoa
Kandinsky erakusketa-katalogoak artistaren ibilbidea islatzen du modu erakargarrian. Hasteko, sarrera moduan, Tracey Bashkoff-en entsegu bat dago; gero, artistaren pintura enblematikoenei buruz Karole P. B. Vailek idatzitako sarrerak; eta, ondoren, erakusketako obra guztien irudi bikainak.
Eros ezazu