Yoshitomo Nara

Yoshitomo Nara (Hirosaki, Aomori prefektura, 1959) bere belaunaldiko artista japoniarrik ezagunenetako bat da. Haren haur itxurako figuren erretratu bereizgarri, maitagarri, enigmatiko eta/edo mehatxagarriak ikono gurtu izatera iritsi dira, baita zenbait adierazpen sozialen ikur ere, artistaren lana hasiera-hasieratik nabarmendu izan duten aktibismoaren eta kezken erakusgarri. Yoshitomo Narak egikera tradizionaleko artea sortzen du, bere haurtzaroan eta historia pertsonalean ez ezik, punk musikan, folkean eta rock undergroundean ere errotua, baita Europako eta Japoniako literaturan, naturan eta artearen historian ere. Erakusketa honetan haren ibilbide osoa ikus daiteke: alde batetik, Japonian 1980ko hamarkadan sortutako lehen lanak egongo dira ikusgai; lan horietan Nararen historia pertsonaleko elementu errepikariak agertzen dira, hala nola etxea eta lehen haur figurak, Takeshi Motai bezalako beste artista batzuen eraginpean eginak.

Bestetik, Narak Alemanian egin zuen egonaldi oparoa jasotzen du erakusketak; egonaldi hartan, artistak hizkuntzaren mugak ezarritako isolamenduari aurre egin zion A.R. Penck-en laguntzarekin Kunstakademie Düsseldorfen espresionismo alemana ikasten eta deskubritzen zuen bitartean. Garai hartan hasi zen laster bere lengoaia bereizgarriaren parte bezala ezagun egin ziren pertsonaia nagusiak bere ekoizpenean sartzen. 2000. urtean Japoniara itzultzean egin zuen lana eta harrezkero sortu dituen pinturen, marrazkien, instalazioen eta eskulturen sorta garrantzitsua jarriko da erakusgai haren ibilbide osoaren testuinguruan.