Egun bat museoan
Bizi esperientzia ahaztezina Guggenheim Bilbao Museoko erakusketak eta arkitektura paregabea ezagutuz.
Bisita itzazu erakusketetako gune didaktikoak, hezkuntza-tresna ezberdinak aurkituko baitituzu bertan: testuak, software interaktiboak, ikus-entzunezkoak, audio-artxiboak, laguntza-materialak, irudiak, irakurketa-eremuak eta abar, erakusketetan sakontzen laguntzeko.
* Eskaneatu QR kodea aretoetan, eskuratu entzuteko gidak doan mugikorrean eta gozatu bisitaldiaz.
Zero
Atondoa
Bisitaldia ZERO aretoan hastea gomendatzen dizugu, lengoaia bisualaren eta eszenografia harrigarriaren bitartez murgiltze-esperientzia berezia eskaintzen baitu.
ZERO atondoan dago, eta publiko guztiei egiten die ongietorria Museoaren eta ingurumarien historia, Frank Gehryren eraikina bera eta Guggenheim Bilbao Museoaren Bilduma modu sentsorialean azalduz.
Atrioa
1. solairua, Atrioa
Atrioa eraikinaren bihotza da, eta kanpoaldea eta barrualdea bateratzen ditu. Haren inguruan antolatzen diren pasabideek aukera ematen dute artelanak ikuspegi berrietatik behatzeko.
Denboraren materia
1. solairua, 104. aretoa
Richard Serraren Denboraren materia, 1994–2005 instalazioa bere osotasunean igarotzean denbora eta espazioa esperimentatu daitezke, baita aktibatu ere.
Zortzi eskultura erraldoiz osatutako multzoa 104 aretorako berariaz sortua da. Piezak egitea erronka itzela izan zen —punta-puntako teknologiari esker lortu zen—, eta instalatzea ere oso konplexua izan zen, altzairuzko plantxak ikaragarri astunak baitira eta haien gainazala, berriz, oso hauskorra.
Aretoaren bukaeran hezkuntza-gune bat ikusiko duzu, eta, bertan, erakusgai dauden obren maketak ikusiko dituzu, baita artelanak nola instalatu zituzten erakusten duen ikus-entzunezko bat ere, besteak beste. Ez utzi ikusi gabe!
Richard Serra
Denboraren materia (The Matter of Time), 1994–2005
Altzairu herdoilkorra
Neurri aldakorrak
Guggenheim Bilbao Museoa
Kokapen zehatzeko obrak (Museoaren barrualdean)
1. solairua, Ataria
Frank Gehryk diseinatutako eraikinaren barruko zein kanpoko espazioekin hartu-emanean ageri zaizkigun kokapen zehatzeko artelanak Guggenheim Bilbao Museoaren Bildumako parte garrantzitsua dira.
101 aretoan, Atrioaren ondoan, Jenny Holzerrek 1997an sortutako Bilborako instalazioa aurkituko duzu.
Jenny Holzer
Bilborako instalazioa (Installation for Bilbao), 1997
Argizko diodoak
Kokapen zehatzeko neurriak
Guggenheim Bilbao Museoa
Bar Guggenheim Bilbao
Plaza
Atseden hartu edo mokadu bat jan nahi baduzu, bisitatu Bar Guggenheim Bilbao taberna. Museoko plazan dago, Bistró ondoan.
Kanpoaldea
Kanpoaldea
Itsasadarrera ematen duen terrazatik begiratuz gero, ohartuko zara hiri-ingurunean ezin hobeto txertatzen dela Museoa, bai eraikuntzarako erabilitako materialei esker (titanioa, kristala eta kareharria), bai inguruko eraikin eta egiturekin duen harremanagatik ere.
Urmaelak, Bilboko itsasadarrak hiriarentzat duen garrantzia azpimarratzeaz gain, kokagune paregabea eskaintzen die Anish Kapoor eta Yves Klein artisten obrei.
Atriotik, Museoaren kanpoaldera terrazatik aterata, Eduardo Chillida eta Louise Bourgeoisen artelanak begietsi ahal izango dituzu. Eta eraikinaren kanpoaldean ikusgai daude, halaber, Fujiko Nakaya, Daniel Buren eta Yves Klein artisten piezak, aldizka abiarazteko programatuta.
Anish Kapoor
Zuhaitz garaia eta begia (Tall Tree & The Eye), 2009
Altzairu herdoilgaitza eta karbono-altzairua
1297 X 442 X 440 cm
Guggenheim Bilbao Museoa
Guggenheim Bilbao Museoaren Bildumako artelanak
3. solairua
Hirugarren solairuan, Guggenheim Bilbao Museoaren Bildumako artelanak erakusketa dago ikusgai. Erakustaldiak XX. mendearen bigarren zatiko eta XXI. mendearen hasierako mugimendu nabarmenenetako batzuk ezagutzeko aukera ematen du Cristina Iglesias, Sol LeWitt edo Mark Rothko bezalako artista garrantzitsuek gure erakundearen funtsetan dauzkaten sorkuntzen bitartez.
Arkitekturaren ikuspegitik, hirugarren solairuko aretoetan berriro zabaldu dituzte sabaiko argi-zuloak, jatorrizko diseinuari keinu egiteko.
Jatetxeak
Jatetxeak
Museoan kalitate handiko sukaldaritza-esperientziak eskaintzen dituzten bi gune daude: Nerua Guggenheim Bilbao, goi-mailako sukaldaritzako jatetxea, eta Bistró Guggenheim Bilbao, proposamen informalagoa.
Denda-Liburudenda
1. solairua
Museoko Denda-Liburudendan diseinuzko objektu sorta zabala dago eskuragarri, eta baita katalogo, argitalpen eta opari desberdinak ere. Deskontuak daude Museoaren Lagunentzat. Erosoago aritzeko, bisitatu gure online denda.
Martha Jungwirth
Austriako Martha Jungwirth (1940) artistari eskainitako erakusketa Museoko bigarren solairuko 205., 206., 207. eta 209. aretoetan kokatzen da.
Figurazioaren eta abstrakzioaren arteko erdibidean, Jungwirth-ek bere pinturak sortzen ditu ikusizko estimuluak abiapuntu hartuta; hala nola, erretratuak, prentsa-irudiak edo bidaietako paisaiak, baita Frans Hals, Francisco de Goya edo Édouard Manet bezalako maisuen artearen historiako maisu-lanak ere.
Jungwirth-ek irudi figuratiboak trazu eta zipriztinen keinu kontrolatu bilakatuko ditu, eta, horretarako, koloretako arkatzez, grafitoaz, pastel koloreko kraioiez, ikatz-ziriaz, pastelaz, lumaz eta tintaz, akuarelaz eta olio-pinturaz baliatuko da. Gainera, artistak euskarri harrigarriak aukeratzen ditu; esate baterako, erretratu-euskarrien kartoizko atzealdeak, paper-biribilki zaharrak eta baita kontabilitateko liburu zaharrak ere.
Ikus itzazu sortu berriak dituen lan monumentalak 209. aretoan.
Martha Jungwirth
Maja III, Francisco de Goya seriekoa, Maja, 2022
Paper gaineko olio-pintura, mihise gainean muntatua
264,5 x 226,8 cm
Alkar Contemporary Collection (ACC) – Bilbo
Yoshitomo Nara
Yoshitomo Narari (1959) eskainitako erakusketan, haren pintura, marrazki, zeramika eta eskultura batzuk bildu dira, eta My Drawing Room instalazioa gehitu zaie; hau da, artista japoniarrak lan egiten duen estudioaren simulazioa.
Laurogeita hamarreko hamarkadan, Alemanian egin zuen prestakuntza-egonaldian, Nara estilo berri bat garatzen hasi zen, eta, era horretan, lehen aldiz sortu zituen haurren eta animalien inguruan egiten dituen figura bereziak. Kawaii (japonieraz maitagarria) izatetik urrun, pertsonaiek itxura bihurria eta, batzuetan, baita mehatxagarria ere erakusten dute.
Protesta eta bihurrikeria jarrerak 1950eko eta 1960ko hamarkadetan, eskubide zibilen aldeko mugimenduetan eta Vietnamgo gerraren aurkako protestetan sortutako musika-banden folk eta rock abestien melodiak eta mezuak ekartzen ditu gogora. Izan ere, pertsonaia batzuek gerren eta nuklearren kontrako esloganak dituzte.
Nararen pintura geruza ugari zorrotz aplikatzearen emaitza da, eta geruza horiek pinturaren gainazala ñabardura kromatiko ugariz hornitzen dute.
Yoshitomo Nara
Gauerdiko malkoak
(Midnight Tears), 2023
Akrilikoa mihise gainean
240,5 × 220 cm
Artistaren bilduma
© Yoshitomo Nara, eskaintza: Yoshitomo Nara Foundation
