Guggenheim

Bizi esperientzia ahaztezin bat Guggenheim Bilbao Museoko erakusketak eta arkitektura paregabea bisitatuz. Erabili eskura dituzun zerbitzu eta baliabide guztiak, zure bisita ahalik eta gehien osatzeko. Adi zoruko geziei, bidea adieraziko baitizute (norabide bakarrekoa izango da), eta gogoratu segurtasun-distantzia gorde behar duzula, bai artelanekiko (1 metro), bai beste bisitariekiko (2 metro).

 

Zero

Atondoa

ZERO aretoan hastea gomendatzen dizugu; gune honek murgiltze-esperientzia aparta eskaintzen du ikusmenezko hizkera eta eszenografia harrigarria baliatuz. ZEROk Atondotik bertatik egiten die ongietorria publiko guztiei: Museoaren historiara eta haren ingurura zentzumenen bidez hurbiltzeko aukera ematen du, baita Frank Gehryren eraikinera eta Guggenheim Bilbao Museoaren Bilduma Iraunkorrera ere. Edukiera mugatua.

Sala ZERO | Guggenheim Bilbao Museoa

Atrioa

1. solairua, Atrioa

Atrioa da, bere 50 metrotik gorako altuerarekin, Museoaren benetako bihotza, eta Frank Gehryren arkitektura-diseinuaren gune nagusietako bat. Halaber, aparteko espazioa da kultur jarduera eta ekitaldiak antolatzeko.

Interior del edificio, Atrio | Guggenheim Bilbao Museoa

Denboraren materia

1. solairua, 104 aretoa

Richard Serraren Denboraren materia (The Matter of Time, 1994-2005) instalazio iraunkorra Guggenheim Bilbao Museoaren Bildumako obra ospetsuenetakoa da, eta bakarra munduan. Hura ikusteko, artistak gomendatzen du 104. aretoan sartzea, instalazioaren ikuspegi partziala izateko, eta ondoren bigarren solairuko balkoira ateratzea, kristalezko igogailuak erabilita (edukiera mugatua), espazio osoaren ikuspegi panoramikoa izateko.

Igogailu metalikoak erabilita (edukiera mugatua) edo haien ondoko eskaileretatik itzul zaitezke lehenengo solairura. 104. aretoan, eskulturen inguruan ibili ahal izango zara, eta haietako batzuetan sartu ere bai. Gogoratu adi egon behar zarela zoruko geziei, ibilbidea adieraziko baitizute.

Richard Serra
Denboraren materia (The Matter of Time), 1994–2005
Altzairu herdoilkorra
Neurri aldakorrak
Guggenheim Bilbao Museoa

Irakurri gehiago
La Materia del Tiempo | Richard Serra | Guggenheim Bilbao Museoa

Film & Video

1. solairua, Film & Video aretoa

Film & Video aretoak bideoartea eta mugimenduan dagoen irudia lantzen ditu, eta, udazkenera arte, William Kentridge hegoafrikarraren instalazioa hartuko du (datak berrikusten ari gara). Kentridge funtsezkoa da zinemaren eta bideoinstalazioaren azken urteotako historian. Bere obran, marrazkia, zinema, koreografia, eskuz egindako animazioa edo eszenografia uztartzen ditu, besteak beste.

Aurkezpeneko bederatzi pantailen bidez, Kentridgek George Méliès zinematografia modernoaren jeinu sortzaile eta aitzindariari hel egiten dio, eta, aldi berean, autorretratu oniriko bat egiten du, marrazkilarien estudioa agertoki kosmiko gisa erabiliz. Instalazioaren osagai guztiak (7 atal Georges Mélièsentzat; Eguna gauaren ordez eta Ilargirako bidaia) 2003koak dira, eta zinema-areto batean gaudela sentiarazten digute. Azkenak Philip Millerren jatorrizko musika darabil.

Irakurri gehiago

Richard Artschwager

1. solairua, 105. aretoa

Udazkenera arte (datak berrikusten ari gara), erakusketa honek, Germano Celanten ardurapean, Artschwagerren ibilbide sortzailea aztertzen du, berrogeita hamarreko hamarkadan hasi zenetik mende honetako lehenengo hamarkadara arte. Haren obretan funtsezkoa da mahai-tresnak eta altzariak irudikatzea, baita duela gutxi asmatutako material industrialak erabiltzea ere; besteak beste, formika, celotexa eta aluminioa.

Sailkapenak edo mugimenduak alde batera utzita, eta pinturaren eta eskulturaren artean, haren obra umorez eta sekulakotasunez beteta dago. Pianoak, egiturak eta harridura-markak (2008-2012) serieko piezak dakartza.

Richard Artschwager
Atea } (Door }), 1983–84
Akrilikoa zur eta beira gainean
Neues Museum Nürnberg
© Estate of Richard Artschwager, VEGAP, Bilbao, 2020
Argazkia: Annette Kradisch

 

Irakurri gehiago

Kokapen zehatzeko obrak (Museoaren barrualdea)

1. solairua, Ataria

Guggenheim Guggenheim Bilbao Museoaren Bildumaren parte garrantzitsua dira artista garaikideek gauzatutako kokapen zehatzeko obrak, Frank Gehryk diseinatutako eraikinaren bai barrualdeko eta bai kanpoaldeko espazioekin elkarrekintzan landuak. 101. aretoan dago, Atrioaren aldamenean, Jenny Holzerren Bilborako instalazioa (Installation for Bilbao, 1997).

Jenny Holzer
Bilborako instalazioa (Installation for Bilbao), 1997
Argizko diodoak
Kokapen zehatzeko neurriak
Guggenheim Bilbao Museoa

Irakurri gehiago

Bar Guggenheim Bilbao

Plaza

Deskantsu beharrean bazaude edo mokadu bat jan nahi baduzu, bisitatu Bar Guggenheim Bilbao taberna. Museoko plazan dago, Bistró ondoan. Oraingoz, zerbitzua etenda dago.

Kanpoaldea

Kanpoaldea

Itsasadarrera ematen duen terrazatik, zeure begiz ikusi ahal izango duzu Museoak nola egiten duen bat hiri-inguruarekin, bai eraikuntzarako erabilitako materialei esker (titanioa, kristala eta kareharria) eta bai inguruko eraikin eta egiturekin duen harremanagatik ere.

Ohartuko zara, baita ere, Museoaren kanpoaldea kokaleku paregabea dela Guggenheim Bilbao Museoaren Bilduma osatzen duten Louise Bourgeois, Daniel Buren, Anish Kapoor, Yves Klein, Jeff Koons eta Fujiko Nakaya artistek sortutako kokapen zehatzeko obra iraunkorrentzat.

Anish Kapoor
Zuhaitz garaia eta begia (Tall Tree & The Eye), 2009
Altzairu herdoilgaitza eta karbono-altzairua
1297 X 442 X 440 cm
Guggenheim Bilbao Museoa

Irakurri gehiago
El gran árbol y el ojo | Anish Kapoor | Guggenheim Bilbao Museoa

Jatetxeak

Jatetxeak

Museoak kalitate handiko bi sukaldaritza-esperientzia eskaintzen ditu: Nerua Guggenheim Bilbao, goi-mailako sukaldaritzako jatetxea, eta Bistró Guggenheim Bilbao, proposamen informalagoa. Oraingoz, zerbitzua etenda dago.

Interior del restaurante Nerua | Guggenheim Bilbao Museoa

Olafur Eliasson

2. solairua

Bigarren solairuan, ikusi Olafur Eliasson: bizitza errealean erakusketa. Udazkenera arte egongo da zabalik (datak berrikusten ari gara). Artista daniar-islandiar horren artea pertzepzioarekiko, mugimenduarekiko, gorputzaren esperientziarekiko eta banakoen emozioekiko duen interesetik sortzen da.

Erakusketan, 1990 eta 2020 artean sortutako hogeita hamar bat obra daude, tartean eskulturak, argazkiak, pinturak eta instalazioak; besteak beste, Likenezko horma (1994) eta Ur-jauzia (2020), zeina eraikinaren kanpoaldean kokatuta baitago.

Olafur Eliasson
Zure zalantzazko itzala (kolorea) [Your uncertain shadow (colour)], 2010
HMI lanparak (berdea, laranja, urdina, magenta), beira, aluminioa, transformadoreak
Thyssen-Bornemisza Art Contemporary Collection, Viena
© Olafur Eliasson
Argazkia: María del Pilar García Ayensa / Studio Olafur Eliasson

Irakurri gehiago

Lygia Clark. 1948–1958

3. solairua: 305., 306. eta 307. Aretoak

Hirugarren solairuan (305., 306. eta 307. aretoak), udazkenera arte egongo da zabalik (datak berrikusten ari gara) Lygia Clark artista brasildarrak 1948 eta 1958 artean sortutako margolan eta marrazkien erakusketa (figuraziotik abstrakziora). Gainera, logelen hiru maketa txiki ditu, ikerketa arkitektonikoan aritu izanaren erakusgarri.

Clark autodidakta eta aitzindaria izan zen arte terapeutikoaren esparruan; harentzat oso garrantzitsua zen prestakuntza, eta, aurrerago, Sorbonako Unibertsitateko irakaslea. Han, bere esperientziak eta ekintza sentsorial eta parte-hartzaileak ikertzen zituen, eta ikasleekin eta jendearekin partekatzen. Artea eta adimenaren eta gorputzaren arteko ezagutza oso lotuta zeuden, eta funtsezkoak ziren artistarentzat. Erakusketa osatzen duen hezkuntza gunean lor dezakezu informazio gehiago.

 

Irakurri gehiago

Guggenheim Bilbao Museoaren maisulanak

Hirugarren solairua, 301, 302, 303 eta 304 aretoak

Hirugarren solairuan, Guggenheim Bilbao Museoaren Bildumako maisulanak bisita dezakezu. Erakusketak Bildumako zenbait obra garrantzitsu aurkezten ditu, hala nola Gau-ordena ospetsuak (Die berühmten Orden der Nacht, 1997, Anselm Kiefer, 302. aretoa) edo Bi triedroren elkartzeak sortutako kutxa metafisikoa. Leonardori omenaldia (1958, Jorge Oteiza, 301 aretoa).

Anselm Kiefer
Gau-ordena ospetsuak (Die berühmten Orden der Nacht), 1997
Akrilikoa eta emultsioa mihise gainean
514 x 503 x 8 cm
Guggenheim Bilbao Museoa

Irakurri gehiago
Las célebres órdenes de la noche | Anselm Kiefer | Guggenheim Bilbao Museoa

Denda-Liburudenda

1. solairua

Museoko Denda-Liburudendan diseinuzko objektu sorta zabala dago eskuragarri, eta baita katalogo, argitalpen eta opari desberdinak ere. Deskontuak daude Museoaren Lagunentzat. Erosoago aritzeko, bisitatu gure online denda.